Blerina Tërbunja: Pa datë

Rrugët e qytetit më duken labirinthe
asgja nuk e ka kuptimin e vet
sdi në ç’drejtim po shkoj

Shoh hije njerëzish që kalojnë pranë meje
diellin gjithë kohën e shoh në zenit
akrepat e orës ecin mbrapa

Nuk e di se ç’datë asht sot
mëngjeseve nuk dua ti hap sytë
në mbrëmje gjumi asht tinzar

Kam humbur përtej detit
përtej hanës jam tretë
nuk di ma me ecë qiellit

Kot shuhen yjet
më la dhe dëshira për të dëshirue
për njat’ diell që s’lind ma për mue